top of page

我長大的地方......

八十年代頭出世,九十年代聽四大天王的歌長大,一家六口連兩隻兔仔住喺300呎都唔知有無的公屋,當時打開報紙好多都係樓盤廣告,我最愛就係睇住個樓層平面圖幻想一下我地三姐弟瞓邊間房?阿爸阿媽瞓邊間房?阿爺瞓邊間房?仲有無地方養多隻狗?我同家姐間房仲可以點佈置......,因為我一直都沒有自己既空間,亦沒有機會去做自己喜歡的事。

 

 

我從小就不愛美術課!

未遇上拼貼藝術前,我對任何藝術媒介一點興趣都無!畫的屋係典型三角形屋頂、長方型煙囪,不懂任何顏色配襯,亦不會花任何時間喺手作工藝上!總之「視覺藝術」與我好似點都唔會有任何關係。

 

在對的時間遇上對的事情

婚後把全職工作推掉了,改為全職FREELANCE,偶然機會下遇上拼貼藝術,遇上一位無私的好老師,又剛巧有一個完全屬於自己的空間,可以不分晝夜,唔食去廁所既情況下將屋企既凳、層架、櫃、鞋、袋不斷拼不斷貼不斷油,我終於可以為屬於自己的空間打扮一番啦!由於小時候對樓層平面圖有強烈的幻想,現在我可以為自己的居所一手一腳的改造,所以這門工藝已深深地令我着迷了!拼貼的好處係可以把舊的變為新的,原本棄置的變為從生賦予生命,令平平無奇的變為獨一無二的。我由最初既興趣入門班,到修讀DALA南非拼貼藝術導師證書,之後跑去台灣進修蝶古巴特並作交流,跟小時候對視覺藝術一曉不通的我,好像變了另外一個人

 

我的工作

我曾經服務過0-6歲學前嬰幼兒,分別係本港既幼兒中心、幼稚園、特殊幼兒中心及PLAYGROUP工作過,當中最享受係特殊幼兒中心任教的時間,現在我仍然會為有特殊需要既幼兒提供訓練。好慶幸我過往擁有十多年教學經驗,對於將知識傳授給別人這門技巧對我來說係一件享受的事,所以無論係製作拼貼過程中還是教授拼貼過程中我都係十分享受。

 

拼貼藝術在香港

拼貼藝術在香港其實已發展了好一段時間,但仍然是一門冷門的手作,一點都不普及。其實對於不懂畫畫,但又想擁有自己一件屬於自己的藝術品,拼貼絕對係一個很好的選擇,只要再加一點彩繪技巧或拼貼特殊技巧(如:裂紋),其實大家都可以成為民間藝術家!

 

 

 

bottom of page